Balade 479 : Je hé mes jours et ma vie dolente (DCCCXIV)

Balade

                        Je hé mes jours et ma vie dolente,
                        Et si maudy l’eure que je fu nez,
                        Et a la mort humblement me presente
                        Pour les tourmens dont je sui fortunéz.
5                                  Je hé ma concepcion
                        Et si maudy la constellacion
                        Ou Fortune me fist naistre premiers,
                        Quant je me voy de tous maulz parsonniers.

                        Car povreté chascun jour me tourmente,
10                    Par son fait sui hayz et diffaméz,                                                       213d
                        Chascuns me fuit, ne nulz ne me parente,
                        Les riches voy trop bien emparentéz.
                                    Ceulz ont indignacion
                        De moy veoir de qui creacion
15                    Je sui estraiz, si sui plus bas que biers,
                        Quant je me voy de toux maulz parsonniers.

                        Helas ! il n’est nul, tant sage se sente,
                        Se riches n’est, qui ja soit honoréz.
                        Maiz s’un homme a trois cens livres de rente,
20                    Tant soit cocart, chascuns sera paréz
                                    En dissimulacion
                        De li faire grans inclinacion.
                        Or sui povres, je vy a grans dengiers
                        Quant je me voy de tous maulx parsonniers.