Balade 477 : Helas ! je n’ose aler au boiz (DCCCXI)

Balade

                        Helas ! je n’ose aler au boiz,
                        Pour ce que je sui trop peléz,
                        Et de certain say se je y voiz
                        Que je serai de tous poins rez,
5                      Et lors seray plus diffaméz
                        Que n’est homs sanz barbe ou menton.
                        Jusqu’ deux ans seray huvéz,
                        Sanz defubler mon chapperon.

                        Il me convendra estre coys
10                    Et honteux comme est uns bruléz,
                        Car les cheveux que je congnoiz
                        Seront dessus mon chief ostéz.
                        Ainsi seray deshonoréz.
                        Las ! dolent ! Pourquoy ce fait on ?
15                    J’ay plus chier estre rençonnéz
                        Sanz defubler mon chapperon.

                        Et se l’en veult dire : ―Tu doiz
                        Estre de ce fait confortéz,
                        Car ainsi l’ordonne li roys,
20                    Tant sui je plus desconfortéz.
                        Car se nulz en est depportéz,
                        Estre l’en doy : j’offre rançon,
                        Ou je suis perdus et gastéz,
                        Sanz defubler mon chapperon.