Balade 475 : On sert a court de grant plenté de mez (DCCCIX)

Balade

                        On sert a court de grant plenté de mez,
                        A pluseurs gens qui y sont officiers,
                        De grosses chars, de rost et de brouéz,
                        De lappereaux, de connins, de plouviers,
5                      De gras chappons, de perdriz, de danttiers.
                        Maiz plus un mez ay que maint n’y ont mie,
                        Sanz ypocras, car sur les derreniers
                        Je suis a court tousjours serviz d’oublie.

                        Et la ne puis, ne de loing ne de prez,
10                    Estre servis, n’avoir cum les premiers
                        Potage ou rost, pour ce faiz mes regrés,
                        En moy plaignant a vous des cuisiniers,
                        Maiz je me lo a tous des pannetiers                                                  212d
                        Qui ont sur moy prins tel merencolie
15                    Qu’en trestous cas et plusqu’il n’est mestiers
                        Je suis a court tousjours serviz d’oublie.

                        C’est un mengier qui ne vault q’un pou frez,
                        Et qui n’est pas aux malades trop chiers,
                        Et quant il pleut, il est tantost deffaiz.
20                    Oncques ancor n’en mengay volentiers.
                        Pourquoy donques m’est de servir routiers
                        Chascun a court de tel més ? C’est folye.
                        S’on donne riens, vray est cum li sautiers,
                        Je suis a court [tousjours serviz d’oublie.[

                        L’envoy

25                    Maistres d’ostel, parléz aux escuiers
                        En commandant qu’aye de la boulye.
                        Recommandéz mon fait aux aumosniers.
                        Je suis a court tousjours serviz d’oublie.