Balade 474 : Au roy supplie pour Dieu et en pitié (DCCCVIII)

Autre Balade

                        Au roy supplie pour Dieu et en pitié,
                        Au duc d’Anjou, a Bourgogne, a Bourbon,
                        Uns petiz nains, garniz de povreté,
                        Que vous ayéz memoire de son nom.
5                      […][1]
                                    Servi vous a longuement
                        En Languedoc, armé souffisamment,
                        Il a aidé mettre vo guerre a fin,
                        Prez de Bordeaux et ailleurs bien souvent.                                       212c
10                    On l’appelle maistre Jehan Tastevin.

                        A Bergerart a en armes esté,
                        Devant Durans, a Basac la saison,
                        A Saint Macaire ou fin cuer de l’esté,
                        A Bourdilles, a Condac, ce scet on,
15                    A Montsegur, a Lango environ,
                                    Ou il perdi grandement,
                        Marteau, son chien, et sa male ensement.
                        Trop a souffert par dela de hustin,
                        Tant que son fait va moult petitement :
20                    On l’appelle [maistre Jehan Tastevin.]

                        Qu’il vous plaise, seigneur tres[re]doubté,
                        Avoir pité du povre valeton,
                        Qui a present est trop desconforté,
                        Car en Quersin n’a vache ne mouton
25                    Que les Angloys n’ayent prins sans ranson,
                                    Lui donner presentement,
                        Pour vous servir plus honorablement,
                        Or ou argent, armures ou roussin,
                        Ou vo plaisir, pour vivre honnestement :
30                    On l’appelle maistre Jehan Tastevin.

[1] Vers manquant