Balade 471 : Pour Dieu, se je ne voiz voler (DCCCV)
Balade
Pour Dieu, se je ne voiz voler
Ou chassier, si con je souloye,
Au roy m’en veilléz excuser,
Car rien faire a droit ne saroye.
5 Se je voys prés tantost a voye
Aux fauconniers, je sui cocart,
L’en mescrie : ― Arrier, deable ait part !
Tiréz arrier de celle place,
Fait faillir avéz un malart.
10 ― Mauvaiz y fait, ce dit Eustace.
S’on treuve grue, il faut aler
Deux ou troiz seulz prendre leur voye,
Les autres bien en sus troter,
Et eulx catir c’on ne les voye,
15 Et s’aucuns a getter s’avoye
Les faucons, et la grue part,
Sanz estre prinse : ― A la male hart,
Dit on, que cilz pendre se face !
La est on tanséz tost et tart :
20 Mauvaiz y fait, ce dist Eustace.
Au hairon se faut tourmenter,
Et chascun si crier c’on l’oye,
Courir aprés sanz sejourner,
Et tousjours braire : ― Hoye hoye !
25 De courre aux chiens n’ay nulle joye.
D’estre au title est nomméz musart.
Se ces chiens a droit ne depart,
Des veneurs a mauvaise grace.
On le claime en disant : ― Bernart !
30 Mauvaiz y fait, ce dist Eustace.
L’envoy
Prince, mieulx vauldroit, simple et coye, 212a
Dame en chambre ou l’en se soulace
Que tel riot, mieulx l’ameroye :
Mauvaiz y fait, ce dit Eustace.
