Balade 470 : Grosse de corps, ronde comme une pomme (DCCCIV)

Balade

                        Grosse de corps, ronde comme une pomme,
                        Yeux de corbaut, noire comme une choe,
                        Hure de leu, dens de serpent vous nomme.
                        De cahuant avéz trop bien la moe.
5                      Quant vous marchéz, vous faictes une roe
                        Dont l’en vous sieut a flair comme un sengler.
                        A droit jugier qui droictement vous loe,
                        Faicte fustes pour enfans estrangler.

                        Lucifer fu vo pere et non pas homme,
10                    Et Brohadas vous conçupt en la boe.
                        Royne d’enfer, c’est ce qui vous renomme :
                        L’un coucheroit en vostre gueule une oe.
                        Vous n’avéz[1] oit qui ne semble la poe
                        D’un oliphant, vo resgart fait trembler,
15                    Tout le pays de vous veoir s’esbloe :
                        Faicte fustes pour enfans estrangler.

                        Plus laide n’a de vous de cy a Rome.
                        Comme un torel avéz chascune joe,
                        Vous ronfléz fort comme vous avéz somme,
20                    L’en vous oit bien jusques a la Danoe,                                              211d
                        Vos tettes sont comme soufflés c’on cloe,
                        Troys chers vous faut pour vostre corps branler,
                        Vous peséz plus que pressoir[2] n’escroe.
                        Faicte fustes pour enfans estrangler.

[1] Ms. mavez

[2] Saint Hilaire corrige en pressouer