Balade 469 : Hugues d’Ars, Garences, Rossoy (DCCCIII)

Autre Balade

                        Hugues d’Ars, Garences, Rossoy,
                        Prunelé et vous, Florigni,
                        Par vous cinq trop de maulz reçoy,
                        Par Poitiers et par Savoisy,
5                      Par Huet d’Angenné[1] aussy.
                        A vous ne puis durer en place.
                        Des maintenant tous vous reny :
                        Maudy soyéz de par Eustace.

                        L’un fiert, l’autre moque de moy,
10                    En disant :  ―De savetier fy !
                        L’autre ne me laisse par foy
                        Boire ne mengier deléz lui :
                        Cent foyz sui le jour assailly
                        Tant que je ne say que je face,
15                    Bastu, defulé et laidi :
                        Maudi soyéz de par Eustace.

                        Avoir ne puis ne droit ne loy.                                                              211c
                        A chartiers m’envoient aussi.
                        Tous ensemble et chascun par soy
20                    M’avéz maint mal fait. Or vous pry
                        Que jusques a la Saint Remi
                        Chascun bon sauf conduit me face,
                        Si non par desconfort vous dy :
                        Maudy soyéz de par Eustace.

                        L’envoy

25                    Princes, gens plus mauvaiz ne vy
                        De ceulx qui ne m’ont pas en grace.
                        Pour ce leur offre et ce leur di :
                        Maudiz soiéz de par Eustace.

[1] SaintHIlaire corrige en Iangennes