Balade 472 : Du mal saint Fremin d’Amiens (DCCCVI)

Autre Balade

                        Du mal saint Fremin d’Amiens,
                        Du saint Fiacre et du saint Quentin,
                        De la rage qui prent les chiens,
                        Du mau saint Leu, de l’esvertin,
5                      Du saint Josse et saint Matelin,
                        Et d’estre comme folz tondus,
                        Et de tous maulx, soir et matin,
                        Soit maistre Mahieu confondus !

                        Dettraiz comme saint Soubastiens
10                    Soit de sayettes en la fin,
                        Et mis emmiers[1] et en liens
                        Con hors du senz, en haut chemin
                        Soit encr[o]éz pour larressin,
                        Et pour mourdre au derrain pendus
15                    Par crain a queue de roussin.
                        Soit maistre Mahieu confondus !

                        De son corps ne demeure riens
                        Que les corbeaux et leur poussin
                        Ne deveurent, impaciens
20                    Soit et a tous vices enclin,
                        Car trop fait aux gens de hutin
                        Par les teschetes qu’il mist sus.
                        De mau buvrage et de venin
                        Soit maistre Mahieu confondus !

                        L’envoy

25                    Racaille, du mau saint Martin,
                        Et de tous maulx de plus en plus,
                        Des broignes[2] et de maufretin,
                        Soit maistre Mahieu confondus !

[1] Saint Hilaire corrige en en ceps

[2] Saint Hilaire corrige en broches