Balade 464 : Adieu vous dy, boys, rivieres et pars (DCCXCVIII)

Autre Balade

                        Adieu vous dy, boys, rivieres et pars,
                        Deduit de chiens, d’oysiaux et de voler,
                        Adieu connins, perdris et fresches chars,
                        Adieu frois vins, dames c’on doit loer,
5                      Adieu la terre ou l’en puet reposer,
                        Douce eaue aussy, adieu ! Trop me fait mal
                        Quant je vous laiz pour apprendre a humer.
                        Desor me fault boire a un vermical.

                        Adieu molz liz, adieu piteux regars,
10                    Adieu plain frés que l’en souloit trouver.
                        Il me convient porter honeur aux lars,
                        Aux commutres qui ne font que siffler.
                        Il me convient aux et becuit riffler,
                        Et chevauchier un perilleux cheval.
15                    Voirre n’aray ne tasse, et pour trinquer
                        Desor me faut boire a un vermical.

                        Maiz qui pis est, j’orray de toutes pars
                        En ces vaissiaux bruire la haute mer,
                        Frapper ces vens et escrier ces gars,
20                    L’un mettre a bort, l’autre desgosiller,
                        L’un dessus l’autre et venir et aler,
                        Et soy bouter en soulte u fons aval
                        Pour le tempest : c’est au desesperer !
                        Desor me fault boire a un vermical.

                        L’envoy

25                    Princes, veilléz aux fourriers commander
                        Qu’il me logent ou palays princippal
                        C’est en pouppe, car pour moy condempner                                    210c
                        Desor me fault boire a un vermical.