Balade 465 : Plouréz, plouréz, Robinet le tirant (DCCXCIX)

Balade

                        Plouréz, plouréz, Robinet le tirant !
                        Plouréz, Regnault d’Engennes et Sampy !
                        D’Estouteville s’en voit Jehannet plourant,
                        De Nantoillet, Languillette et aussy
5                      Ploure, Huguenin, que Dieux face mercy
                        Celle qui vint de l’un de vostre sorte !
                        Savéz qui c’est ? Demenéz plour et cry :
                        C’est la fille Montagu qui est morte.

                        Helas ! oncques ne fu plus bel enfant,
10                    Car de Juno la dieuesse nasqui,
                        Et Jupiter la fist a son semblant
                        Qui tant avoit le viaire poly
                        Et en tous cas sembloit si bien a ly
                        Que pour sa mort chascun se desconforte.
15                    Reconfortéz le pere, je vous pry :
                        C’est la fille Montagu qui est morte.

                        Car je say bien qu’i[1] sera trop dolant :
                        Sy n’avoit elle encor an que demy.
                        La deesse menrra le dueil trop grant.
20                    Pour leur amour faiz l’obseque a par my.
                        Chascuns de vous qui estes sy amy,
                        Vestéz vous noir : maiz c’on le reconforte.
                        Louvecienne avoit l’enfant nourry.
                        C’est la fille Montagu qui est morte.

                        L’envoy

25                    Princes, cellui qui ma maison vendy
                        Veille aider Dieux ! autre enfant ly rapporte,
                        Et si vous plaist sçavoir quoy et de qui :
                        C’est la fille Montagu qui est morte.

[1] Saint Hilaire ocrrige en qu’il