Balade 462 : Chascuns se tient en amours honoré (DCCXCVI)

Autre Balade

                        Chascuns se tient en amours honoré
                        Quant s’amour a seulz sa dame et s’amie,
                        Et quant il est d’elle tout seul amé.
                        Dont sui je bien, car chascuns certifie
5                      Qu’en un seul lieu n’ayme pas ma partie
                        Tant seulement, ain[çoi]s est ses evis
                        D’amour si grant, dont Amour regracie,
                        Que ma dame a en tous temps .iii. amis.

                        S’ai grant joye quant je suis assené
10                    A sy doulz cuer et qui tant s’umilie
                        Que banneret seray double clamé :
                        Deux compaignons ay en ma compaignie.
                        Bien faire a .iii. est plus grant courtoisie
                        Qu’a un tout seul : de la vient paradiz.
15                    C’est charité, dont un chascun s’escrie
                        Que ma dame a en tous temps .iii. amis.

                        Tout vient de lui et de sa voulenté,
                        De jour en jour son amour multiplie.
                        Elle ameroit une communauté.                                                          210a
20                    Tant a doulz cuer qu’il n’est nul, si la prie,
                        Qui n’ait s’amour ne qu’elle en escondie.
                        En ce commun me sui boutéz et mis.
                        Or prain congié, plus ne veul ceste vie,
                        Que ma dame a en tous temps .iii. amis.