Balade 460 : Les troys offres que firrent les .iii. roys (DCCXCIV)

Autre Balade

                        Les troys offres que firrent les .iii. roys
                        En Bethleem quant Jhesus Crist fu nez,
                        Ne les offres des anciennes loys
                        Des Sarrasins, des Crestiens, des Grés,                                            209c
5                      Ne des Juifs ne sont pas comparéz
                        Aux offrandes des plus especiaulx
                        Qui chascun jour [sont] beniz et sacréz.
                        Et qui sont il ? ― Se sont les generaulx.

                        Il sont benit de .ii^c. mille voys,
10                    Et chascun jour veritable appeléz,
                        Car ilz treuvent les gens .xiiii. moys,
                        Avant que nulz puist estre debutéz.
                        Qui vous donra jamaiz croix n’en aréz.
                        A poursuir faut vendre ses chevaux,
15                    Et par telz gens povres enfin seréz :
                        Et qui sont il ? ― Ce sont les generaux.

                        Pour ce leur faut offrir, car c’est bien droys.
                        Sy leur offron la gravelle es costelz,
                        La goute es flanz et la crampe en leurs doys,
20                    Le mau sainct Leu, la fievre d’autre lez,
                        Tous les tourmens dont Dieux est aornéz
                        Et puet garir la doleur et les maulx.
                        Puissent estre destruis et tourmentéz !
                        Et qui sont il ? ― Ce sont les generaulx.