Balade 459 : Si, comme on dit, chascun sert .iiii. moys (DCCXCIII)

Autre Balade

                        Si, comme on dit, chascun sert .iiii.[1] moys
                        Des serviteux qui sont en ordonnance,
                        Entre lesquelz en a quatre trop fraiz,
                        Ou je ne sers nul temps a court de France,
5                      Car il m’ont trop refreidi des m’enfance :
                        Novembre y est, puis Decembre et Janvier,
                        Fevrier aprés qui tous reumes[2] avance :
                        En ce froit temps [3] s’en fait bon estrangier.

                        Car adonc sont et gellees et noys,
10                    Pluyes et vens, en grant desordonnance.
                        Lors aux senglers[4] s’en va chassier li roys,
                        [Et] officiers qui sont sur la despence
                        Soufflent leurs mains. Chascun garre sa pence,
                        Batent leurs corps pour eulx du froit vengier,
15                    Page a cheval font nice contenance.
                        En ce froit temps s’en fait bon estrangier.

                        Petiz pages pleurent de froit aux boys,
                        Qui de tenir leur bride n’ont puissance.
                        Quant au logis, Dieu scet comme il est froys,
20                    Et a dangier se fait la delivrance
                        De busche avoir. En sale est on en trance,
                        Deffuléz sont servant et escuier :
                        Qui ne veul lors a court dancer tel dance,
                        En ce froit temps s’en fait bon estrangier.

                        L’envoy

25                    Prince, qui a argent, gage ou creance,
                        Ces .iiii. moys s’en traye l’en arrier,
                        Ne voist a court pour oster sa grevance :
                        En ce froit temps s’en fait bon estrangier.

[1] Ms. par .iiii.

[2] Ms. et remue

[3] Ms. En ce temps froit

[4] Ms. sengliers