Balade 455 : Compains, compains, je sçay mieulx vostre estat (DCCLXXXIX)

Autre Balade

                        Compains, compains, je sçay mieulx vostre estat
                        Que je ne fiz a vostre partement.
                        Laissié[1] m’avéz pour aler au debat.
                        Sanz revenir, car trop songneusement
5                      A coche avéz celle qui vous deffent
                        Le retourner, aussy fait le pillage
                        Que vous améz trop amoureusement :
                        Maiz a la fin vous convient laissier gaige.

                        Fortune ainsy des compaignons s’esbat,
10                    Qui au delit de la char les comprent,
                        Puis les destruit, con la souriz le chat,                                             208c
                        Car au derrain est prins qui autre prent.
                        La male vie a male fin [se] tent,
                        Ainsy le tient l’Escripture et le saige.
15                    Ce temps durra et non pas longuement,
                        Maiz a la fin vous convient laissier gaige.

                        A telz eschés seréz vous rendu mat,
                        Sy chiet a point, de quoy say et comment.
                        Car sur la fin se porteront de plat
20                    Vos besongnes et treschetivement.
                        Aviséz bien vostre gouvernement.
                        Bon fait laissier en tous temps fol usage :
                        Tenu l’avéz trop anciennement,
                        Maiz a la fin vous convient laissier gaige.

[1] Ms. laissiéz