Balade 454 : Au roy supplie Eustace, vostre hussier (DCCLXXXVIII)

Balade

                        Au roy supplie Eustace, vostre hussier,
                        Que comme il ait des Octobre quatre ans
                        Que deux cens frans ly volsiés octroyer,
                        Quant vous fustes son hostel visitans,
5                      Sur generaulx, ou il a perdu temps,
                        Pour poursuir est sa bource trop nette.
                        S’a grant mestier que soyéz commandans                                      208d
                        A Montagu qu’i[1] ly paye sa debte.

                        Promis avéz sur le moys de Fevrier
10                    Que vous seréz sa besongne ordonnans,
                        Et le feréz sur vos coffres payer,
                        Et par ma foy ly besoings y est grans,
                        Car il ly faut faire certains despens
                        Pour ce qu’il fait faire une chappelete
15                    En son hostel. Soyéz donc ordonnans
                        A Montagu qu’il ly paye sa debte.

                        Et le faictes ordonner le premier
                        Affin qu’il puist avoir ses deux cens frans,
                        Ou il convient qu’il deviengne bergier
20                    Et qu’il garde brebis aval les champs.
                        Plus ne fera chançons, livre ne chans[2],
                        Ainsois joura de la turelurette
                        Et s’en yra dire, comme uns truans,
                        A Montagu qu’i[3] ly paye sa deblte.

                        L’envoy

25                    Prince, pour Dieu, ne veilléz oublier
                        Vo serviteur, maiz [a] vostre recepte
                        Du moys prochain dites sans delaier
                        A Montagu qu’i[4] ly paie sa debte.

[1] Saint Hilaire corrige en qu’il

[2] Ms. champs

[3] Saint Hilaire corrige en qu’il

[4] Saint Hilaire corrige en qu’il