Balade 451 : J’estoie au kantié, a Boulongne (DCCLXXXV)

Autre balade

                        J’estoie au kantié, a Boulongne,
                        Il n’a pas ancor[e] long temps,                                                           207c
                        A la court du duc de Bourgongne
                        Ou il avoit grant foison gens,
5                      Chevaliers, escuiers, sergens,
                        Et la veissiéz consillier.
                        L’un a l’autre furent disans :
                        ― Et quant venra le Tresorier ?

                        L’un disoit : ― Mau va ma besongne,
10                    Mes chevaulx tendent aux despens.
                        L’autre requeroit c’on ly doigne,
                        Et ly autres estoit engrans
                        De s’en partir pour le froit temps.
                        L’autre disoit : ― Je n’ay denier,
15                    Mes gaiges seront demourans.
                        Et quand vendra le Tresorier ?

                        L’autre dit : ― La ville ressoigne,
                        Mourir y voy petiz et grans,
                        Qui vouldra, sy le me pardongne.
20                    Je m’en veul aler sur les champs.
                        Qui se muert, il est bien meschans,
                        Car nul n’a plus de lui mestier,
                        Pour ce enquier et sui demandans :
                        « Et quant vendra le Tresorier ? »

                        L’envoy

25                    Princes, soiéz vous departans.
                        Je ne voy rire ne dancier
                        Nul, maiz enquierent les enfans :
                        « Et quant vendra le Tresorier ? »