Balade 448 : Je veu a Dieu, aux dames, a Amours (DCCLXXXII)

Autre Balade

                        Je veu a Dieu, aux dames, a Amours,
                        A tous amans, a l’amoureuse vie,
                        Au roy aussy et a tous mes signours[1],
                        A tous les sains, a la vierge Marie,
5                      Que se je puis faire la departie
                        Du faulx paiz ou me suis embatus,
                        Et g’y revien par sens ne par folie,
                        Que je soye tresbien beux et batus.

                        Car plus velus y ay esté c’uns ours,
10                    Noirs et haléz, prins l’orde maladie,
                        Logé aux champs, esté armé tousjours,
                        Cevrons, angart, de nuitye en nuitye.
                        G’y ay gaignié plus de poux la moitié
                        Qu’avoir ne seil, les quelz j’ay combatus.
15                    Se plus y vien je consens et octrye
                        Que je soye tresbien buz et batuz.

                        D’avoir argent font pluseurs leurs clamours.
                        Vive qui puet. Pour ce ne l’ont il mie,
                        Il put en l’ost, l’en y fait des rumours,
20                    L’en oit bondir canons, artillerie,
                        Varlés[2] tuer, l’un brait, li autre crye :
                        « Alarme, ! au feu ! aux larrons ! » C’est biaux jus.
                        S’on m’y voit plus, je veil que chascun die
                        Que je soye tresbien buz et batus.

                        L’envoy

25                    Prince, au retour, humblement vous supplie,
                        Que mes veulz soit confermés et tenuz,
                        En octroyant, se pluz faiz tel folie,
                        Que je soye tresbien buz et batuz.

[1] Ms. messigneurs

[2] Ms ; Carles