Balade 447 : Foudre et tempeste, pluye, vent et gresil (DCCLXXXI)

Balade

                        Foudre et tempeste, pluye, vent et gresil,
                        Gellee et nois, toute terre brehengne,
                        Mort et langour et tout mortel peril,
                        Guerre en tous temps et toute malestraine,
5                      De jour en jour, de mal en pis avaigne
                        A la conté de Flandre[1] et au paiz,
                        Si que jamaiz le roy ne m’y ramaine !
                        Il fait milleur sejourner a Paris.

                        Par troiz foys m’a mis la terre a exil,
10                    Par ma logier, par couchier sur la playne
                        Par les canons et par le trait subtil,
                        Par les Gantoys qui trop m’ont fait de payne,
                        A Rosebech, a Bourbourch, puis m’amaine
                        Devant le Dam jouer aux esbahys,
15                    Seoir un mois avant que nulz le prengne.
                        Il fait milleur sejourner a Paris.

                        Onques ne vy mauvaiz hussel de fil
                        Pis desvuider, maudite en soit la layne,
                        Ne tant laissier de fauce herbe ou courtil
20                    Sanz l’ecerber : pour se croist et mehaigne.
                        Qui au premier eust bien serré la vaine,
                        Sanz espargner, ilz fussent mal bailliz,
                        Maiz mal pugnir fait la lever ensaigne.
                        Il fait milleur sejourner a Paris.

                        L’envoy

25                    Princes, mieulx vault la riviere de Seyne.                                        206d
                        Delivréz vous de prendre ses chetis,
                        Puis retourner en vostre vray demayne :
                        Il fait meilleur sejourner a Paris.

[1] Ms. Flandres