Balade 445 : Veéz vous celle qui fait la papelarde (DCCLXXIX)

Balade

                        Veéz vous celle qui fait la papelarde
                        Et celui la qui bien fait le beguin ?
                        Ilz seront cras, car li uns l’autre larde,
                        Ilz ont un mal dont il cheent souvin,
5                      Et pour ce sont entr’eux deux pelerin,
                        Et vont souvent au baron sainct Foutart
                        Qui les garra de ce mal en la fin.
                        Maiz je me doubt que ce ne soit trop tart.

                        Car il convient qui tel mal a qu’il arde,
10                    C’on ne le puet bien refraindre en la fin,
                        Par aigre vin, par verjus, par moustarde.
                        En juene temps ou sexe femenin
                        Quant on trueve [le] jeune masculin,
                        Lors ces deux maulx se joignent d’une part.
15                    Et nonpourquant laisseront ce chemin,                                           206b
                        Maiz je me doubt que ce ne soit trop tart.

                        Quant on est vieulx, li maulx du sant retarde
                        Et faut du tout a voisine et voisin.
                        Si est saiges qui longuement se garde
20                    De ce grief mal ou trop nuit le connin.
                        C’est ce qui fait le mal de sainct Foutin
                        Venir dessoubz, les corps esprent et art :
                        Lors laisseront li veillart ce hutin,
                        Maiz je me doubt que ce ne soit trop tart.

                        L’envoy

25                    Princes, qui boit chascun jour de fort vin
                        Par son boire devient frere Frappart,
                        Et quant vieulx est il retret son engin,
                        Maiz je me doubt que ce ne soit trop tart.