Balade 444 : De sainte Rien, dame juste, la caste (DCCLXXVIII)

Autre Balade

                        De sainte Rien, dame juste, la caste
                        Elisabeth, Agnés et Katherine
                        Trescontinent, puissant qui tout degaste
                        L’erreur d’autry par vo bonne doctrine.
5                      Trespacient plus que sainte Cristine,
                        Et plus que Marthe en vos faiz concieuse,
                        Magdaleine qui de plourer ne fine,
                        Jamaiz nul jour ne seréz amoureuse.

                        Desor ne soit nulz qui vous touche ou taste :
10                    Vostre amour est en pensee divine,                                                 206a
                        Vostre esperit d’aler [avant][1] se haste,
                        Sainte Avoye vous a fait sa benigne,
                        Des mandiens tendéz la dicipline,
                        Ceulx vous menront en la vie joyeuse,
15                    Vos pis batant, car vous en estes digne :
                        Jamaiz nul jour ne seréz amoureuse.

                        Du monde avéz du tout laissié la haste
                        Ou vous fustes jadiz juene meschine :
                        En rost fustes, or seréz mise en paste.
20                    Il en est temps, car vo biauté decline.
                        En charité donnéz de vo cuisine
                        Aux povres gens, et ne soiéz crueuse
                        A vos amis, tresssaincte chose et digne :
                        Jamaiz nul jour ne seréz amoureuse.

                        L’envoy

25                    Hé ! Rebequa tressaige et enterine,
                        Sarra loyal, qui tant fu precieuse,
                        Judith, Hester, vostre joye define :
                        Jamaiz nul jour ne serés amoureuse.

[1] Blanc dans le ms.