Balade 442 : Qui est cilz compaings si joliz (DCCLXXVI)

Balade

                        Qui est cilz compaings si joliz,                                                           205c
                        Si gracieux et si courtoiz,
                        Qui salue les gens toudiz
                        Et qui s’offre a eulx tant de foys ?
5                      ― Voire, que tu ne le congnoiz ?
                        Ce ne fay moy. Moult scet de tours,
                        Tost a failly de deux en troiz.
                        C’est un grant donneur de bons jours.

                        Est il gaiz, en parler faictis,
10                    Biaux et blons, gens, longs et adroys,
                        Juenes, bien chantans, yeux traitis,
                        Bien dançans, paréz comme un roys ?
                        De cuidier est en son droit moys.
                        Il voit, il oit, il n’est pas sours,
15                    Il fait a ses polses les droiz :
                        C’est un grant donneur de bons jours.

                        Il ne tient conte des chetifs,
                        Il est entrans, il a ses loys.
                        Il accorde a chascun ses diz.
20                    Il parle ainsis comme tu l’oiz
                        […][1]
                        Et proffite entre les seignours.
                        Cure n’a de ceulx qui n’ont croix :
                        C’est un grand donneur de bons jours.

                        L’envoy

25                    Princes, cilz n’est pas esbahis.
                        Par tut veult faire ses honnours,
                        Savoureux, qui tant a d’amis !
                        C’est un grant donneur de bons jours.

[1] Vers manquant