Balade 441 : Je vous faiz commendement (DCCLXXV)

Balade

                        Je vous faiz commendement,
                        De par le roy de Laidure,
                        Que vous veignéz en present
                        Devant sa propre figure :
5                      Point ne vous fera d’injure.
                        Vous y devéz bien venir.
                        Pour avoir vostre droiture,
                        Des Laiz vous veult retenir.

                        ― Suis je doncques de sa gent
10                    A vostre male aventure ?
                        ― Oil, plus que son sergent,
                        Et vous m’avéz dit ingure.
                        Passéz tost, car je vous jure,
                        Je vous feray convenir.
15                    Venéz au roy, bonne aleure :
                        Des Laiz vous veult retenir.

                        ― Oy, vois : Dieu gart, roy puissant !
                        Vecy vostre creature.
                        ― Vous dites voir, bien veingnent
20                    Pour l’amour de vostre hure
                        Vous retien, car par nature
                        Mon cerf vous faut devenir.
                        Merciéz loy, je n’endure :
                        Des Laiz vous veult retenir.

                        L’envoy

25                    De laide face et obscure,
                        Laidement vous faut tenir.
                        Vers le roy vo fait procure :
                        Des Laiz vous veult retenir.