Balade 440 : Se nulz homs doit estre roy de Laidure (DCLXXIV)
Balade
Se nulz homs doit estre roy de Laidure,
Pour plus laideur c’on ne porroit trouver,
Estre le doy par raison et droiture,
Car j’ay le groing con hure de sangler[1],
5 Et aux singes puis assés ressambler.
J’ay grans dens et nez camus,
Les cheveulx noirs, par les joes barbus
Suy et mes yeux resgardant de byays,
Par le front sui et par le corps velus :
10 Sur tous autres doy estre roy des Lays.
J’ay des long temps trop estrange figure.
Comme un More me puet on figurer :
Pinteléz sui et forméz sanz mesure,
Cours, rons et gros, ne me puis acoler.
15 L’en me doit bien comme roy couronner.
Je sui courbéz et bossus,
Gresles dessoubz et espés par dessus.
De tel forme n’a nul roy au palays.
Et par ces poins determine et conclus :
20 Sur tous autres doy estre roy des Lays.
Dorenavant faut toute creature
Que l’en pourra veeir et esprouver,
Laide de fait et de propre[2] nature,
Par devers moy retenir et donner
25 Aucun estat, [et] si s’en veult courser,
Tant sera mes subgiéz plus :
Toutes mes gens mettre vous feront sus,
Et retenir tous, hydeux pour jamaiz.
Par moy sera ly regnes soustenus :
30 Sur tous autres doy estre roy des Lays.
L’envoy
Princes, nulz homs a moy ne se figure.
Je, souverains, mes retenues faiz, 205b
Tous estas doing seculiers et de cure :
Sur tous autres doy estre roy des Lays.
[1] Ms. sanglier
[2] Ms. sa propre
