Balade 439 : De maulx coustiaux forgiéz en Lombardie (DCCLXXIII)

Autre Balade

                        De maulx coustiaux forgiéz en Lombardie,
                        Du tret de Genne et de leurs viretons,
                        Des ars anglaiz et de ceulx de Turquie,
                        Des dondaines et lances de Gascons,
5                      Des plommees et haches des Bretons,
                        Et des engins et pierres c’on y lance,
                        Des grans garros et pierres des canons
                        Puist il morir qui mal faire me pance !

                        Ferus soit il de mort d’epidymie,
10                    Et tous froiciéz de grans cops de bastons.
                        D’aguilles ait d’Antioche a demie
                        Le ventre plain, de tranchans rasoirs bons
                        Ait il coppé la gorge, et d’esperons
                        Soit il ferus trestout parmy la pance,
15                    Et d’espees du chief jusqu’aus[1] talons :
                        Puist il morir qui mal faire me pance !

                        Des croques poys, des masses de Surie
                        Et des espiéz trenchans […][2]
                        Et des dagues dont li aciers brunie,
20                    De tous tempés, de toutes maliçons,
                        Et de tous maulx que de certain savons,
                        Que Dieux garist par sa digne puissance,
                        De l’esvertin, de poingnans aguillons,
                        Puist il morir qui mal faire me pance !

                        L’envoy

25                    Prince, jamaiz ne puist jour avoir vie,
                        Qui mal me veult ou me fera grevance.
                        Du mal des dens et de mort enragie
                        Puist il morir qui mal faire me pense !                                             205a

[1] Ms. jusques aus

[2] La fin du vers manque