Balade 438 : Hugues d’Ars et Prunelé (DCCLXXII)

Autre Balade sur aucuns chevaliers et escuyers de la cour

                        Hugues d’Ars et Prunelé,
                        Garensieres, Florigny[1],
                        Les deux Machaus, Angelé,
                        Petiot, Huet, Villy,
5                      M’ont maintes foys assaily
                        Et fait rop de villenye,
                        Batu, feru et laidy :
                        Je pri Dieu qu’i[2] les maudie.

                        En ma tente m’ont robé,
10                    Et sur le ventre sailly,
                        De piéz et de poins foulé.
                        Poinsinet, de Juvigny,
                        Et Torchapel que je vy
                        M’ont m’avoyne deperie.
15                    Pité n’ont, grace, mercy[3] :
                        Je pri Dieu qu’i[4] les maudie.

                        Ancor m’ont il plus tromppé :
                        De larron m’ont donné cry,
                        Et sur un cheval troussé
20                    Par l’ost m’ont mené ainsy,
                        Crians : « Amblé a cecy !
                        Pendéz ! Ne le laissiéz mie ! »
                        Pour ce a tousjours les reny :
                        Je pry Dieu qu’i[5] les maudye.

                        L’envoy          204d

25                    Prince, ainsi m’ont pourmené
                        Vos gens. c’est mauvaise vie,
                        Es gresillons m’ont bouté :
                        Je pry Dieu qu’i[6] les maudie.

[1] Ms. et Florigny

[2] Saint Hilaire corrige en qu’il

[3] Ms. ne mercy

[4] Saint Hilaire corrige en qu’il

[5] Saint Hilaire corrige en qu’il

[6] Saint Hilaire corrige en qu’il