Balade 437 : A bon droit de tous estre louee (DCCLXXI)
Autre Balade
A bon droit de tous estre louee
Celle qui tant a des biens de nature,
De sens, d’onnour, de bonne renommee,
De doulx maintien l’exemple et la figure
5 D’umilité, celle qui met sa cure
A honorer un chascun en droit li,
Qui gent corps a, juene, fresche, joly,
De hault atour, de lignie royal.
Celle n’a pas a maniere failly.
10 A bon droit n’est d’elle un cuer plus loyal.
Elle aime Dieu, elle est de tous amee,
Car plesir fait a toute creature,
De son pais est formant regretee,
Et ou elle est se maintient nette et pure.
15 Pité la suit, elle het toute injure,
Aux povres gens a le cuer amoly.
Les orguilleux fait tourner a mercy.
Tout cuer felon jet, mauvaiz, desloyal,
Elle aime paix, loyaulté, et ainsy
20 A bon droit n’est d’elle un cuer plus loyal.
Et se tu veulz savoir dont elle est nee,
Ovide voy, en lisant[1] l’escripture
Ou Saturnus a la soyer la blee :
Lors trouveras sa propre norreture.
25 Et en aprés en la doulce pasture
Pourras trouver fil de roys son mary,
En la cité du grant regne ennobly 204c
Qui n’a pareil de ceptre imperial.
Dont par ces poins puis bien conclure aussy :
30 A bon droit n’est d’elle un cuer plus loyal.
[1] Ms. ly sault
