Balade 436 : Qui saroit bien que c’est d’Amour servir (DCCLXX)
Autre Balade
Qui saroit bien que c’est d’Amour servir, 204a
Et comment homs se puet faire valoir
Quant de dame puet grace desservir,
En bien amer mettroit tout son vouloir,
5 Desir, penser, cuer et corps et pouoir,
Car par amour vient honneur et prouesse,
Estat, renom, biau maintien, gentillesse,
Humilité et toutes les vertus.
C’est ce qui met tous les royaulmes sus.
10 Maiz sans luy est vaillance, honneur, perie.
Amer pour ce doivent roys, princes, dus
Armes, amours, dames, chevalerie.
Et cilz qui puet par service venir
A si hault don comme de recevoir
15 Le nom d’amant se doit subgés tenir,
Fermes, secrés, loyaux, sans decevoir,
Et doit son cuer a tout bien esmouvoir,
Querir honneur, estre plains de largesse,
Et qu’il se gart d’orgueil et de peresse,
20 En emprenant les haulx faiz et cremus
Des troiz mestiers qui sont d’armes tenus,
Joustes, tournoy, et la guerre n’oublie.
Nobles ces poins doivent querir les plus :
Armes, amours, dames chevalerie.
25 Or veillent donc a ces poins avertir
Ceulx qui aiment, facent bien leur devoir :
A leurs dames se gardent de mentir
Et facent tant qu’elles puissent avoir
Bon renom d’eulx, et s’il ont bon espoir
30 Et qu’il gardent les haulx droiz de noblesse,
Tant que pechié n’ordure ne les blesse,
Par tout seront pour leurs faiz bien venus,
Leurs royaumes puissamment soustenus,
Et y verréz gent joyeuse et jolye
35 Chanter, dansser, continuer le plus
Armes, amours, dames, chevalerie. 204b
L’envoy
Princes, pays ne puet estre perdus
Ou Amour est loyaument maintenus.
Maiz qu’il ne soit fains et en tricherie,
40 Car par barat en seroient exclus
Armes, amours, dames, chevalere.
