Balade 435 : Bourbon, Bar, Eu, Harecourt et Coucy (DCCLXIX)
Balade
Bourbon, Bar, Eu, Har[e]court et Coucy,
De Bresch l’enfent, toute la noble armee,
De vos amours ne soyéz en soucy. 203d
Car puis c’oneur en estrange contree,
5 Vous a par mer fait voguer en galee
Pour arriver aux pors de Barbarie,
Dame n’y a qui pour vous tous ne prie
En desirant vostre doulz retourner
Et supplians a la vierge Marie
10 Que le bon vent vous puist tost ramener.
Contreroleur sui pour vous et par sy
Que se g’y voy nulle qui se desree,
Je lui diray que pas ne face ainsy,
Qu’elle n’en feust un peu souspeçonnee.
15 Nulle n’en say fors que loyal trouvee
Et qui ne soit a son amant amie.
Que requerans n’y ait ne dy je mie,
Dont maint trassent pour leur desir trouver.
Maiz on leur fait, disant, la sourde oye,
20 Que le bon vent vous puist tost ramener !
Pour ce a toutes en reconfortant dy
Que de vous n’yert Sarrazine priee,
Et qu’au retour ne feréz long detry
Que chasun n’ait sa dame visitee :
25 Car de bon cuer devra veoir s’amee.
Pas ne tiennent que ce soit moquerie.
Pour vo demour chascune pleure et crie,
Mainte veu ont fait et maint cierge alumer,
Maint don offrir et a mainte abaye,
30 Que le bon vent vous puist tost ramener.
L’envoy
Princes, baron, chevalier, escuierie,
De bien faire ne vous faultque penser :
Dame n’avons par deça qui ne die
Que le bon vent vous puist tost ramener !
