Balade 434 : D’autel amour comme puet amer mere (DCCLXVIII)
Balade
D’autel amour comme puet amer mere
Son vray enfant vous aim et ay amee,
Craint et chery com filz doit faire pere,
Et chascun jour estes dans ma pensee 203c
5 Si fermement seule dame honnouree
Que je ne puis a nulle autre penser.
Et si me faut ceste amour si celer,
Qu’a vous n’a nul dire ne l’oseroye,
Dont au jour d’uy n’ay de doleur mon per,
10 Sy pry Amour que sa grace m’envoye.
Car vo douçour, vo biauté singuliere,
Vostre bonté, vostre grant renommee,
Vo doulz maintien, vo face blanche et clere,
Plaisant a tous, vo maniere loee,
15 Vo gent atour, vo parole atrempee,
Humilité c’on puet en vous trouver,
Et les doulz rays de vostre regarder
Me font languir quelque part que je soye,
Et a mon cuer mon esperit tenser :
20 Sy pry Amour que sa grace m’envoye,
Ou je mourray de mort dure et amere,
Comme celui qui m’a la char ostee,
De descouvrir son dueil et sa misere
Et qui bien scet que c’est amour celee,
25 Seche mon corps, ne creature nee
Ne puet savoir dont me vient ce penser.
Ainsi morray pour vos biens desirer
Et vostre honnour qui ainsis me guerroye,
Ou je ne puis nul guerdon[1] esperer,
30 Sy pry Amour que sa grace m’envoye.
L’envoy
Humble dame, veuilléz considerer
Comment desus me demaine et tournoye,
Et que je muir pour vous craindre et amer,
Sy pry Amour que sa grace m’envoye.
[1] Ms. guerredon
