Balade 432 : Des sept vertus et des .vii. dons de grace (DXLVI)
Autre Balade
Des sept vertus et des .vii. dons de grace
De quoy Dieu voult creature honnorer,
Vueille embelir a ce jour vostre face,
Et pour vous mieulx, chiere dame, louer,
5 Face vo cuer en tel lieu assener,
Ce jour de l’an, que vous soiés clamee
La flour des flours et de chascun amee
En vous donnant l’onnour qu’eurent jadis
Judith, Hester, Sarre, Penelopee,
10 Menalippe[1], Rebeque et Thamaris.
Et par ma foy, se bien dire l’osasse,
Aux sept dames vous puis bien comparer.
Car vo biauté Judith en doulceur passe,
Qui par pité voult son peuple sauver
15 D’Olofernes. Et Hester d’onnorer
Assuerus n’ot plus humble pensee.
Ne plus loyal ne fu Sarre trouvee,
Ne tant d’onnour n’orent en leurs pais
Judih, Hester, Sarre, Penelopee,
20 Menalippe, Rebeque et Thamaris,
Que vous avéz, car vo grant bien efface
Penelope, pour Grece gouverner.
Menalippe a paour de vostre face,
Qui par armes fist mains pais gaster.
25 Rebeque en sens ne vous pourroit passer,
N’en prouesce Thamaris l’onnoree
Qui roy Cyrus mist mort et son armee.
Car en tous cas surmontéz et en pris
Judith, Hester, Sarre, Peneloppee,
30 Menalippe, Rebecque et Thamaris.
L’envoy 172d
Dame, au jour d’uy vous doing cuer et pensee,
Ceste chançon pour vo bien figuree,
Qu’aux grans vertus de ces dames descrips :
Judith, Hester, Sarre, Peneloppee,
35 Menalippe, Rebeque et Thamaris.
[1] Ms. Menalope
