Balade 430 : Se tous les biens que Fortune promet (DXLIV)
Balade
Se tous les biens que Fortune promet, 172a
Et tous les dons qui sont de sa puissance
Estoient miens, et eusse a mon souhait
Honneur, deduit, estat, force et vaillance,
5 Beauté de corps, jeunesce, or et finance,
Chiens et oisiaux, grans chevaulx pour jouster,
Plaisans joyaulx, tout ce c’om puet penser
Pour corps humain, a tout renonceroie
Pour un seul point que vous vueil declarer :
10 Se ma tristesce estoit tournee en joye.
Des grans regnes que Fortune sousmet
Et que tout feust a mon obeissance,
Et ce qui est aux elemens subget,
En terre, en mer, l’air, le feu, la constance
15 De non mourir, mais vivre en habondance
A tousjours mais, et de mieulx esperer,
Ne me chaurroit, car si me tient amer
En grant tristour que treseureux seroie,
Sanz plus vouloir fors ce point demander,
20 Se ma tristesce estoit tournee en joye.
Car la douleur ou desespoir me met
Pour celle en qui j’ay petit d’esperance,
Qui passe tout en biauté et qui fait
Par sa douceur a tout[1] homme plaisance
25 De sens, d’onneur, de toute contenance,
De biau maintien, de son doulx regarder,
A fait mon cuer d’amoureux dart larder,
Si que sanz lui estre lié ne pourroie,
Mais par octroy pourroit mon mal cesser
30 Se ma tristesce estoit tournee en joye.
L’envoy
Prince d’Amours, bien vous puis affermer,
Que dessus tous le plus aise seroie
Que l’en peust en ce monde trouver,
Se ma tristesce estoit tournee en joye.
[1] Ms. toute
