Balade 429 : Mon cuer au corps chascun se combat (DXLIII)
Balade
Mon cuer au corps chascun se combat,
En lui blasmant son penser, sa folie,
Et ce qu’i[1] veult amer en hault estat,
En noble lieu, en treshaulte lignie.
5 Veult que le corps lui tiengne compaignie, 171d
En le menant par tout ou il vourra,
Ou se ce non le cuer dit qu’il mourra,
Et que par ce fera le corps perir
Puisque veoir sa dame ne pourra :
10 Ainsi ont trop cuer et corps a souffrir.
Car le corps sent son cuer qui se combat,
Qui frit et art, qui plaint, qui pleure et crie
Cent fois le jour, et nul temps ne s’esbat.
Repos ne prent fors que merencolie
15 En regretant la fleur humble et jolie,
Ou jamais jour par son dueil n’avenra,
Car rien n’en scet. Helas ! qui lui dira ?
Cuer n’oseroit, bien se dust repentir
De sa folour, mais neant n’en fera :
20 Ainsi ont trop cuer et corps a souffrir.
L’un pour l’autre languit en ce debat.
Force est de corps par le cuer afeblie,
Dont le corps dit : ― Pourquoy me fait tu mat ?
Le cuers respont : ― Tu ne me sequeurs mie.
25 Mouvoir me veulx. mayne moy vir m’amie.
Le corps tremblant a dit : ― Qui[2] te croira,
Je seray mors, aussi l’en t’occira.
De si hault lieu ne te deust souvenir.
― Tu pers ton temps, autrement n’en sera.
30 Ainsi ont trop cuer et corps a souffrir.
L’envoy
Dame, je suy Entendement qui va
Par devers vous et cuer et corps offrir.
Recevéz les, guerre et mort cessera :
Ainsi ont trop cuer et corps a souffrir.
[1] Saint Hilaire corrige en qu’il
[2] Ms. Quil
