Balade 428 : Et que je suy tourmentéz durement (DXLII)

Balade

                        Et que je suy tourmentéz durement
                        En ce que j’ay de vous, le temps passé,
                        Joye et plaisir receu joyeusement.
                        Et my bon jour sont a present cessé,                                                 171c
5                      Car les biaux mos et les doulx m’ont lessé.
                        Par voz escrips me fait Amour la maue.
                        Dont mon cuer [est] triste, las et cassé.
                        Car mes bons[1] jours sont au sel et a l’yaue.

                        Ma joye en dueil, mon plaisir en tourment,
10                    Et mon espoir en courroux trespassé
                        Sont, quant je voy tourner soubdainement
                        Le bien en mal que j’avoie amassé
                        Par vo doulçour. Or m’a desdaing lassé,
                        Qui sanz raison par lettres me rabaue
15                    Au lit de mort sanz estre respassé,
                        Car mes bons jourssont au sel et a l’yaue.

                        Hemy ! helas ! je vifs dolentement.
                        Bien doy hair qui ce fait m’a brassé :
                        C’est Faulx Rapport, qui n’ayma oncque[2] amant,
20                    Qui contre moy a si fort embrassé
                        Par croire tost, et mon cuer si trassé
                        Que de son cry a tousjours me deslaue.
                        Se Pitié n’est, de mort suy apressé
                        Car mes bons jours sont au sel et l’yaue.

                        L’envoy

25                    Dame, je suy vostre serf ligement,
                        D’Amour me plaing, mais de vo bien me lave.
                        Ne m’escripvéz plus si estrangement,
                        Car mes bons jours sont au sel et a l’yaue.

[1] Ms. bours

[2] Ms. oncques