Balade 426 : Tresdoulce fleur toute blanche et vermeille (DXXXIX)

Autre Balade

                        Tresdoulce fleur [toute] blanche et vermeille,
                        A l’estoc vert [et] a la graynne d’or,
                        [Qui] au monde n’avéz [pas] vo pareille,
                        Mais [vous] avéz [un] singulier tresor.
5                                  Seurté par l’estoc vert
                        En voz œuvres et en voz fais appert,
                        Et par le blanc Purté en vous habite,
                        Par le vermeil Paour vous suit et sert.
                        Vostre nom est precieux, Marguerite.

10                    La grayne d’or est sens, qui vous conseille
                        De bien garder vostre honneur, et encor
                        Humilité avecques Biauté veille,
                        Et vo bonté, pour ce me doing des or
                                    A vous, qui monstre en appert
15                    Les biens de soy et non pas en couvert.
                        Vir[1] a de tel fleur a maint l’odeur prouffite.                                      171a
                        Pour ce vous yert mon grief descouvert :
                        Vostre noms [est] precieux, Marguerite.

                        Vous vous ouvréz quand li soleil s’esveille,
20                    A la clarté monstréz vostre chief sor.
                        Quant il couche, vous cloéz vostre oreille
                        Et ne doubtéz leu, penthere ne tor.
                                    Mon cuer pour vous amer pert,
                        Qui a tousjours a vo douceur s’ahert.
25                    Car au jour d’uy n’est fleur de tel merite
                        Come vous estes. Pour ce tous biens dessert :
                        Vostre nom est precieux, Marguerite.

[1] Saint Hilaire corrige en Voir