Balade 425 : S’oncques mon cuer n’avoit senti amour (DCCCVIII)

Balade

                        S’oncques mon cuer n’avoit senti amour
                        Ne sceu que c’est de sa doulce pointure,
                        Mais eust toudis esté en un destour
                        Sanz riens savoir des secréz de nature,
5                      Puis qu’il nasqui, sanz veoir creature,
                        Et il oyoit si doulcement parler,
                        Comme j’ay fait, la tresdoulce figure,
                        Jamais nul jour ne se tendroit d’amer.                                             170d

                        Car humblement me dist la doulce flour,
10                    Par tresdoulx mos, s’Amour m’avoit en cure :
                        Je voy en toy tant de bien et d’onnour,
                        De doulx plaisir [et] de maniere seure,
                        Que d’autre amant fors toy seul je n’ay cure,
                        Pour biau maintien, pour saigement celer,
15                    Dont qui ces mos prendroit bien par mesure,
                        Jamais nul jour ne se tendroit d’amer.

                        Pour ce ameray desormais nuit et jour
                        Et serviray de cuer, d’entente pure,
                        Celle qui est mon refuge et ma tour,
20                    A qui je doing cuer et corps sans laidure.
                        Ses homs devien : face, tant com je dure,
                        Son doulx vouloir, seur my puet commander.
                        Car qui saroit sa doulce nourriture,
                        Jamais nul jour ne se tendroit d’amer.