Balade 424 : Grace d’Amours requiert le douloureux (DXXXVII)
Autre Balade
Grace d’Amours requiert le douloureux
Qui .xii. maulx qu’il a ne puet guerir,
Dont ses las cuers est tourmentéz tous seulx,
Tant qu’il ne puet reposer ne dormir,
5 C’est Doulx Regart, Penser et Souvenir,
Biauté du corps, Jeunesce avec Plaisance,
Honte et Paour, Souvenir qui me lance,
Si font Dangier, Male Bouche et Reffus,
Et Desespoir pour moy tuer s’avance :
10 Se Grace n’est, je suis mors et perdus.
Car nuit et jour tous ses maulx perilleux
Par .xii. foiz me fait Amour sentir, 170c
Sanz y trouver remede gracieux
Ne medecin qui m’en puisse guerir.
15 L’un me destraint, l’autre me vient ferir,
Mais dessus tous Dangier me desavance,
Penser m’assault, Male Bouche o sa lance,
Honte et Paour m’ont avuglé tout sus,
Et Souvenir me tolt toute puissance :
20 Se Grace n’est, je suis mors et perdus.
Doulce Pité, sequeur au langoureux
Qui mon pesant de lermes vueil ouvrir,
Rendre mon corps ou service amoureux,
Et a Juno pour lui tous temps servir.
25 Fay, s’il te plaist, mes maulx aneantir.
Oste de moy Desespoir qui me tance,
Reffus aussi. Baille moy Esperance,
Et que d’octroy me soit fait mes escus
Pour resister, ou je muir sanz doubtance :
30 Se Grace n’est, je suis mors et perdus.
L’envoy
Vray dieu d’Amours, je suy tien des m’enfance,
Et tu m’as pris mieulx qu’oisel a la glus.
Je voy ma fin et ma vie en balance.
Se Grace n’est, je suis mort et perdus.
