Balade 423 : Lequel vault mieulx a jeune chevalier (DXXXVI)
Balade
Lequel vault mieulx a jeune chevalier
Et a homme qui par le monde va,
Belle dame, s’il se veult marier,
Qui jeune soit, ou moyenne qui a
5 L’aage passé ? Et laquelle prendra
Pour le meilleur et pour joieuse vie
Le chevalier ? Seneschal, je vous prie
Que sur ce fait m’escripvéz vostre accort.
Et s’aviséz n’estes de la partie,
10 Demandéz ent a l’amoureux Cliffort.
Car jeunes homs, puisqu’il veult traveiller,
Se belle prent, autre amer ne devra.
Et s’il va hors il ne fait que villier.
Car la beauté convoitee sera
15 De sa femme. Et telz la priera
Qui la lairoit, s’elle estoit enviellie.
S’a lui se tient et ne poursuive mie,
Puis que saoul est, Amour de lui s’estort.
Mais ami jun quiert Amour et amie : 170b
20 Demandéz ent a l’amoureux Cliffort.
Se moyenne est, seur la puet laissier,
Puisque biauté d’elle un pou passera.
Car pour honneur ara son seigneur chier,
Qui en mains lieux son corps va traveillier.
25 Amoureux yert, et il améz sera,
Gays et jolis, sanz nulle jalousie.
Des deux dictes l’un : qui mieulx se marie ?
Marier vueil. Faictes sur ce rapport
A vostre advis : se non, je vous supplie,
30 Demandéz ent a l’amoureux Cliffort.
L’envoy
Seneschal d’Eu, mes cuers en vous se fie.
Enqueréz bien de ceste maladie
Au Tourangoys, a le Breth et au fort
Au conte d’Eu, Harecourt, Jehan de Trie,
35 Et pour estre mieulx la chose fournie,
Demandéz ent a l’amoureux Cliffort.
