Balade 422 : Qu’est devenu printemps, avril et may (DXXXV)
Autre Balade
Qu’est devenu printemps, avril et may ?
Ou est alé le doulx temps que j’avoie
A .xiiii. ans, le corps plaisant et gay,
Les cheveux blons, ou temps que je cuidoie
5 Que l’en m’amoit par amours que j’avoie,
Que je regnay, que je fus honnoree,
Jeune, gente, fresche et fort desiree ?
Vint et cinq ans dura ma jeune flours,
Mais a trente ans fu ma coulour muee.
10 Lasse ! languir vois ou desert d’amours.
Car mon chief blont en cel eage trouvay
Blanc et merlé, ce que pas n’esperoye,
Viaire taint, et pluseurs esprouvay
Eulz destournans de moy et de ma voye,
15 Combien que moult honnoréz les avoie
En la jeune saison que j’ay passee.
Ha ! Viellesce, par toy sui effacee,
Car tu m’as mis en lermes et en plours,
Ou je mourray triste et desesperee,
20 Lasse ! languir vois ou desert d’amours.
Et quelz est il ? Certes, je le diray :
Verdeur n’y a, esbatement ne joye,
Fors espines, ronses, tristesce, esmay,
Langour, freour, dur penser qui m’anoye.
25 Le chahuant ses chans de mort m’envoye,
Autre deduit n’a en celle contree 170a
Fors que gresil, nois, froidure et gelee,
Le souvenir[1] des perdues douçours.
Si prens congié, disans comme jugee :
30 Lasse ! languir vois ou desert d’amours.
L’envoy
Jeunes belles, cuidéz, car je cuiday.
Mais aviséz a la doulour que j’ay.
Prenéz vo temps, car trop vault un bon jours.
Vingt et cinq [ans] ont tenu mon cuer gay,
35 Trente et le plus m’ont fait perdre tout glay :
Lasse ! languir vois ou desert d’amours.
[1] Ms. isouvenirs
