Balade 420 : Oncques nulz homs n’ot cuer de tel nature (DXXXIII)
Autre Balade
Oncques nulz homs n’ot cuer de tel nature,
Si contraire, com je l’ay, a mon corps.
Amer me fait ce qui n’a de moy cure
Et honnorer ce qui me chace hors.
5 Par Doulx Regart est causee ma mors.
Languir me fait Loyaulté tout a plain,
Pité me fuit, mais Dangier et Desdaing
Ont fait Rigueur et Durté m’ennemie.
Ainsi tous temps traveilleray en vain,
10 Se Fortune ne me veult estre amie.
Car je ne croy c’om treuve en escripture
Qui ayme et sert et soit en amours fors,
Obeissans, celans sanz forfaiture,
Perceverans, qu’il n’ait des reconfors.
15 Mais quant a moy je n’ay que desconfors,
Des maleureux tresmaleureux me claim.
Nul plus chetif de moy ne lieve au main,
Quant j’ayme tant ce qui ne m’ayme mie.
Cuer, ce fais tu. Par toy suy a l’estrain,
20 Se Fortune ne me veult estre amie.
Je voy Amour qui n’ayme creature
Qui face bien. Drois est devenus tors.
Qui triche il a souvent doulce pasture. 169c
Faintise fait deffermer mains tresors,
25 Et les vrais cuers qui mectent leurs effors
A bien amer n’ont pas d’amour le pain,
Mais les mauvais. Les bons meurent de fain
Des biens d’Amours, dont n’ay crouste ne mie.
Ains me brasse trop perilleux levain,
30 Se Fortune ne me veult estre amie.
L’envoy
Dame, pour Dieu, estandéz vostre main,
Donnéz espoir au povre qui mendie,
Ou d’Amours muir, et pour ce me complain,
Se Fortune ne me veult estre amie.
