Balade 419 : Tant m’ont surpris vostre doulce parole (DXXXII)
Autre Balade
Tant m’ont surpris vostre doulce parole,
Vostre gent corps et vostre doulx parler,
Vostre maintien treshumble, dame noble,
Que cuer et corps vous vueil du tout donner,
5 Et desormais me pourrés commander
Comme a vo serf qui vous obeira.
Ne jamais jour ne se departira
De vostre amour le povre cuer de my.
Or souffréz donc, et ce me souffira,
10 Chiere dame, que j’aye nom d’amy.
Car de voz biens voy que chascun parole,
Vostre honneur va deça et dela mer,
Vostre renom en mainte terre vole,
Vostre doulçour vous fait partout amer
15 Et en tous lieux la flour des flour[s] clamer,
Qui en tous temps belle et fresche sera.
Ne ja le vent de mesdit ne pourra
Grever l’onnour de vostre corps joly.
Benoite soit donc qui m’octroyera
20 Chiere dame, que j’aye nom d’amy.
Vo sens oir est precieuse escole,
Et bon vous fait chascun jour regarder.
Qui vous croira fol ne sera ne fole,
Bien vous savéz en tous estas garder.
25 Toutes vertus puet on en vous trouver,
Et plus en yst, plus en y demourra,
Tant que voz noms jamais ne perira,
Ne contre honneur n’aréz ja ennemi.
Vostre pitié pour ce consentira,
30 Chiere dame, que j’aye nom d’amy. 169b
L’envoy
Treshumble flour, vueilléz moy accorder
Benignement ce que je vous supply
En tout honneur, et sanz moy refuser,
Chiere dame, que j’aye nom d’amy.
