Balade 418 : Dame, je vien paier ce que je doy (DXXXI)
Balade
Dame, je vien paier ce que je doy
Des que d’Amours oy prins [la] congnoissance,
Ce jour de l’an que vo debteur me voy,
A tousjours mais c’est droite redevance. 168d
5 Pour vo grant bien vien en vostre presence
Vous humblement de mon cuer estrener,
Corps et pouoir et quanque j’ay donner,
Comme vo serf, je ne vueil autre nom.
A ce bon jour ne veuillés reffuser
10 De vo servant, dame, ce petit don.
Si m’aréz fait aussi riche qu’un roy,
Car j’aray lors tous biens en habondance.
Se vous daingnéz ce don prendre de moy,
Dire puis bien que j’ay toute plaisance,
15 Joye, deduit, honneur, bonne esperance.
Mais le reffus me feroit desperer
Quant a tousjours vueil vo serf demourer
Et desservir, ne vueil autre guerdon.
Ne vueille pas vo grace rebouter
20 De vo servant, dame, ce petit don.
Doulce Pitié, gardéz huy vostre loy
Au povre cuer qui fait obeissance.
Amour aussi, pour Dieu, esveille toy.
Regars piteux, monstréz vostre puissance.
25 Grace et Octroy, Maniere et Contenance,
Vueillés pour moy a ma dame parler,
Ou il me fault mes dolens jours finer,
Se ne reçoit mon offre et ma chançon.
Belle, vueillés humblement accepter
30 De vos servant, dame, ce petit don.
L’envoy
He ! Jour de l’an, c’om doit tant honnorer,
Vueilles pour moy tellement labourer
Que mon present soit a ma dame bon,
Par mos piteux lui va dire et monstrer
35 Piteusement : ― Ne devéz refuser 169a
De vo servant, dame, ce petit don.
