Balade 417 : Je say prier une dame d’amer (DXXX)

Autre Balade

                        Je say prier une dame d’amer
                        Comme je vueil, et, par bonne maniere,
                        Dire lui vois et tant bel conseillier
                        En l’oreille : ― Je vous aym, dame chiere.
5                      De vostre octroy vous fais humble priere,                                        168c
                        Vostre suy [je], soiéz doncques m’amie.
                        Or responnéz, ma dame, a lie chiere :
                        M’aymeréz vous ou m’aymeréz vous mie ?

                        Je ne vous say longuement sermonner,
10                    Mais je vous aym d’amour ferme et entiere.
                        Mon cuer, mon corps vous vueil abandonner,
                        Comme celle qui estes la premiere
                        Que j’ay amé. Ne me chaciéz arriere,
                        Ou vous dictes : ― Va t’en, a une fie !
15                    Autre querray, se je vous truys trop fiere.
                        M’aymeréz vous ou m’aymeréz vous mie[1] ?

                        Je ne puis pas grant dangier endurer,
                        A un seul coup fault que m’amour requiere :
                        S’elle dit non, tost[2] m’en convient aler.
20                    S’elle dit sy, j’ay lors joye pleniere.
                        Le plain chemin vault mieulx que la bruiere,
                        Et si aym plus la doulceur que l’ortie.
                        Aviséz cy, estre ne vueil derriere :
                        M’aymeréz vous ou m’aymeréz vous mie ?

                        L’envoy

25                    Princes, l’octroy vueil ou le reffuser
                        A un seul coup, sanz trop grant muserie.
                        A ma dame vueil pour ce demander :
                        M’aymeréz vous ou m’aymeréz vous mie ?

[1] Ms. fie

[2] Ms. trop