Balade 416 : Se mesdisans l’avoient tuit juré (DXXIX)

Balade            168b

                        Se mesdisans l’avoient tuit juré,
                        Qui venimeux sont plus que nul serpent
                        Et qui se sont maintes foiz parjuré
                        Pour nuire amours et amoureuse gent,
5                      Et qui m’ont fait departir du corps gent,
                        Par leur jangler, de la tresbelle nee
                        Ou oncques n’oy nul villain pensement,
                        Sera de moy plus c’onques mais amee.

                        Mais trop me nuist ce qu’elle a enduré
10                    Blasme pour moy, dont elle est ygnorant.
                        S’en ay le cuer noir, triste et acouré,
                        Qui pour son grief nulle joie ne sent.
                        Amer de lui vivra en grief tourment
                        Mon las [de] cuer, telle est ma destinee.
15                    Pour son honneur vous jure loyalment,
                        Sera de moy plus c’onques mais amee.

                        Et se mon corps est loing de elle[1] sevré,
                        Tousjours ara mon povre cuer present.
                        Ainsi aront mesdisans mal ouvré
20                    Et sanz cause fait no departement
                        Par leur mesdit dont chascun d’iceulx ment,
                        Et s’en sera leur ame ainsi dampnee,
                        Menteurs trouvéz, et ma dame ensement
                        Sera de moy plus c’onques mais amee.

[1] Saint Hilaire corrige en d’elle