Balade 415 : Mon cuer, mon corps, ma pensee et m’amour (DXXVIII)

Autre Balade

                        Mon cuer, mon corps, ma pensee et m’amour
                        Vous baille et doing humblement, et presente
                        Tresliement pour estraine, ce jour,
                        Doulce dame que j’aym de vraye entente.
5                      Or recevéz, ma tresbelle jouvente,
                        Ce petit don. si m’aréz enrichy,
                        Car pour vous suy en l’amoureuse sente :
                        A ce bon jour ayéz pité de my,

                        Et m’estrenéz, tresprecieuse flour,
10                    Du doulx octroy qui chascun jour me tempte,
                        Quant je me voy loin de vous en destour
                        Par Faulx Rapport qui toudis me tourmente,
                        Tant que doulour n’est que pour vous ne sente,
                        S’espoir ne feust. Par ma foy je languy.
15                    Si vous suppli, tresdoulce dame gente,
                        A ce bon jour aiéz pité de my !

                        Car vous estes aussi bien en tristour
                        Comme je suy, qui tousjours me guermente.
                        Mais vous vouléz, si fais je, vostre honnour.
20                    Ainsi nous fault mener vie dolente,
                        Mais lens d’amer ne seray ne vous lente.
                        M’amour estes et je suy vostre ami :
                        Laissiéz jangler. De vous n’ay autre attente :
                        A ce bon jour ayéz pité de my.