Balade 414 : Dont puet venir a deux cuers en une heure (DXXVII)

Autre Balade

                        Dont puet venir a deux cuers en une heure,
                        Qui ne se virent oncques que un seul jour,
                        D’eulx entramer et que chascun labeure
                        Secretement, et est ferus d’Amour,
5                      Tant que l’un d’eulx ne scet voie ne tour
                        Comment il puist son amour descouvrir
                        Qu’il a fiché en l’autre sanz retour ?
                        Ainsi m’en va, dont mainte foiz souspir.

                        Dame, dolens vy jadis vo demeure
10                    Et vo regart, dont j’ay tant de doulour
                        Que loing de vous me plain, souspire et pleure.
                        Et d’un seul coup me fery ceste ardour
                        Si ardamment, par vostre grant douçour,
                        Que je seray et suy plus que martir,
15                    Et sanz espoir, dont je muir en langour :
                        Ainsi m’en va, dont maintes foiz souspir.

                        Helas ! m’amour ne vous queurt neant seure,
                        Et si ne sçay, or ay dit grant folour.
                        Car ne vous chault s’il n’est qui me sequeure,
20                    Ains me laissier languir. Tresdoulce flour,                                       168a
                        Aiéz pité de moy et de mon plour,
                        Qu’autre fors vous ne quier jamais servir,
                        Ne autre amer. La est mon droit sejour :
                        Ainsi m’en va, dont maintes foiz souspir.