Balade 412 : Se celle n’est a qui je suy donnéz (DXXV)

Autre Balade

                        Se celle n’est a qui je suy donnéz,                                                     167c
                        Je ne pourray pas vivre longuement,
                        Mais maudiray l’eure que je fu nez.
                        Quant je l’ayme si amoureusement,
5                      […]
                        Ne ne me veult confort ne esperance
                        N’un seul regart donner piteusement :
                        Pour ce langui, c’est ce qui mort m’avance.

                        Comment puet homs estre si fortunéz
10                    Qui ayme fort et qui sert loyaulment,
                        Et sanz pitié est ainsi demenéz
                        Que de mercy n’a nul allegement ?
                        Fait bien Amour ? Nennil. mais faulsement :
                        Elle destruit mon corps par souvenance
15                    De celle a qui je suy homs ligement :
                        Pour ce languy, c’est ce qui mort m’avance[1].

                        Aucuns en voy, dont je suy forcenéz,
                        Qui se portent asséz desloyaulment,
                        Qui sont d’Amours et de leur dame améz,
20                    Et ont guerdon de servir faintement.
                        Ce fait plaisir tel et quel vrayement.
                        Loyaulté fault, Vouloir tient la balance
                        Des bons chacier, des autres mettre avant :
                        Pour ce languy, c’est ce qui mort m’avance.

[1] Ms. S’avance