Balade 411 : Qui veult avoir vie et joye mondaine (DXXIV)

Autre Balade

                        Qui veult avoir vie et joye mondaine                                                167b
                        Et selon Dieu vivre pour paradis,
                        Sanz trop ne pou avoir repos ne paine,
                        Et pour avoir des chasses les deliz,
5                      Boiz et foréz et asséz doulz pays,
                        Plaisant manoir, fort et puissant chastel,
                        Chapelles grans et la messe toudis,

                        A Nyeppe voit, pres le val de Cassel.
                        Ma dame y est de ce lieu souveraine,
10                    Jehanne de Bar qui est des fleurs de liz,
                        Et de Ligni la dame en leur compaigne[1],
                        Et Mortbeque et Ancueille au cler vis,
                        De Hazebruch Yolet, ce m’est vis.
                        Et toutes ont gent corps, adroit et bel.
15                    Donc qui d’Amours vouldra estre ravis
                        A[2] Nyeppe voit, pres du val de Cassel.

                        Encor y est Houdain de douçour plaine,
                        Et Yolent sa fille que je vis,
                        Et Ysabel d’Afiches ou demaine,
20                    De Varennes Helouys vous devis,
                        Et Amelot. Toutes ont d’onneur pris :
                        Un tel tresor est precieux jouel.
                        Qui tout temps veult de joye estre garnis
                        A Nyeppe voit, pres du val de Cassel.

                        L’envoy

25                    Tresdoulces flours, d’amours puis et fontaine,
                        A vous se vient rendre Eustace Morel.
                        Recevéz lay, car qui veult vise saine,
                        A Nyeppe voit, prés du val de Cassel.

[1] Ms. compaignie

[2] Ms. En