Balade 410 : En visitant voult mes maulx enquerir (DXXIII)

Balade[1]           167a

                        En visitant voult mes maulx enquerir
                        Celle qui est la fleur d’umilité,
                        Si me convient adonques regehir
                        Tout ce que j’ay cy dessus recité,
5                      Et lors me dist que c’estoit lascheté,
                                    Et que telle maladie
                        En noble cuer devoit estre laidie,
                        Car homs devoit lors les vertus conquerre.
                        Ce m’a forment ma doulour allegie
10                    Que ma dame fait les hommes de terre.

                        Car terre fu, qui ne puet riens oir,
                        Ares et frois, plain de toute obscurté.
                        Mais par son sens me fist homs devenir,
                        Car elle avoit avecques lui Pité,
15                    Honneur, Valeur, Noblesce et Verité,
                                    Pacience et Courtoisie.
                        De tous les biens estoit acompaignie
                        Que dame puet en tout le monde acquerre.
                        Ainsi m’a fait : par ces poins signifie
20                    Que ma dame fait les hommes de terre.

                        L’envoy

                        Prince, qui a tel dame a sa partie,
                        Noble et puissant, de toute honneur garnie,
                        Qui tant de biens a encloz soubz sa serre,
                        Il est eureux. Dont le suy je a ma vie,
25                    Quant ma dame les hommes fait de terre.

[1] Ballade sur le même sujet que la précédente avec les mêmes rimes et le même refrain