Balade 409 : Ne doit uns cuers bien sa dame servir (DXXII)

Autre Balade

                        Ne doit uns cuers bien sa dame servir                                              166d
                        Qui l’a de mort du tout ressuscité,
                        Qui ne pouoit des tenebres yssir
                        Ou il avoit par treslong temps esté,
5                      Mais par doulceur et par benignité
                                    Dont telle dame est garnie
                        L’a remis sus en festoiant sa vie ?
                        Certes, c’est moy, qui fu froit comme pierre,
                        Or suy gueris. Si convient que je die
10                    Que ma dame fait les hommes de terre.

                        Et qui vouldroit de mon mal enquerir,
                        Je lui diray bien mon adversité :
                        C’est ce que voy toute joye faillir,
                        Amour, prudence, honneur, honnes[te]té,
15                    Armes, deduit, franchise et loyaulté,
                                    Chant et doulce melodie.
                        Douleur regner, tristeur, merencolie,
                        Mesdit, despit et orgueil faire guerre.
                        Mais Dieu mercy par eulz ne morray mie :
20                    Que ma dame fait les hommes de terre.

                        Et ne doit l’en bien telz vices hair,
                        Auxquelz pluseurs sont ainsi ahurté,
                        Qui ne veulent nul honneur poursuir,
                        Ainçoiz suivent toute chetiveté ?
25                    Et li plus grant sont li plus rebouté
                                    En peresce, en couardise,
                        En convoiter et dire villenie,
                        Tant c’om ne scet quel part vaillant cuer querre.
                        Dont j’ay languy, se ne feust la maistrie
30                    Que ma dame fait les hommes de terre.