Balade 408 : Pour la joye que chascun doit avoir (DXXI)

Balade

                        Pour la joye que chascun doit avoir
                        De vostre fruit et lignie nouvelle,
                        Que Dieu face liement apparoir,
                        Dont je supply a la Vierge pucelle,
5                                  Doivent crier tous heraulx
                        Joustes tresgrans d’armes et de chevaulx,
                        De chevaliers et genz qui la affiere.
                        Pour resjoir et allegier voz maulx,
                        Faites crier haultement La Riviere.

10                    Et avec ce la journee savoir,
                        Si que chascun son harnoys renouvelle,
                        Ceulz [de] dedens, quel nombre et leur pouoir,
                        Du pris d’armes quel signe, et la nouvelle
                                    Ou li puis sera desclaux,
15                    Quantes lances doivent courre et quans aux
                        Ceulz de dedens, quel rochet chascun quiere.
                        A l’assembler soiés joyeux et baux :
                        Faictes crier haultement La Riviere.

                        A ces joustes face chascun devoir
20                    De bien jouster. Qui a amie belle
                        Pour son amour face ses corps paroir,
                        En portant hors son jousteur de la selle.
                                   Par les rens soit[1] li assaulx,
                        Et les dames mises en eschaffaulx
25                    Pour pris donner, et puis a bonne chiere
                        Tourner, dancer. C’est le mendre[2] consaulx :
                        Faites crier haultement La Riviere.

[1] Ms. sont

[2] Saint Hilaire corrige en meudre